De Vette Mossel – Hartbeesfontein

Ons geniet dit om vir my verjaarsdag as gesin saam uit te eet. Hierdie foto is op 13 Augustus 2017 geneem, dus 4 jaar gelede. By De Vette Mossel by Harties. Una, ek neem aan jy ken die plekkie?

En so herinner my iPad my aan die foto, so dag voor my verjaarsdag. Seker maar omdat ons nie op die dag gaan uiteet het nie.

Ek het die naam De Vette Mossel die eerste keer iewers aan die kus gesien. Dink ekkek. Maarnou wonder ek, was dit in Parys (Vrystaat?) nie?

Ons was nie honger nie, maar ek het geweet dat ek dit moet beleef. En toe ek dit by Harties van die pad af sien, het ek net geweet dat ek daar wil gaan eet. Vir my verjaarsdag.

Saam met my manlief en kinders. Dus het ek die nooiwerk gedoen, ‘n naweekdag omdat ek in die week verjaar het. Gewoonlik verkies ek my verjaarsdagete op my verjaarsdag.

Dit is ‘n buitelug restaurant en mens kan eet soveel soos jy wil. Nie dat dit vir my lonend is nie, ek word gou vol. Teen die tyd wat die nagereg bedien word, proe ek skaars daaraan.

Maar, oe, jitte! Ek sal baie opoffer vir ‘n heerlike ervaring. Een soos wat De Vette Mossel mens bied.

Die vloer is seesand, die eetplek onder tente. Dit is rof en grof afgewerk, met bordjies soos die ene in my hand om te vat ek foto’s te neem. Ons het met ‘n hele paar gespeel.

Dit voel soos vakansie by die see. Almal skop skoene uit en sit kaalvoet by hulle tafels, loop kaalvoet rond.

Daar is baie vir kinders om te doen. My kleinkinders het sommer so by ons voete gespeel in die sand terwyl ons eet en eet en eet … Hulle was nog heelwat kleiner.

My manlief hou daarvan om my vir my verjaarsdag met ‘n ete te bederf.

Verlede jaar het ons einde Junie tydens inperkings in die Almaty aangekom. ‘n Maand en ‘n half voor my verjaarsdag. En restaurante was toe as gevolg van Covid. Onsmagook nie gekuier het nie, slegs drie mense mag saam gewees het.

Toe besluit ons om my verjaarsdag alleen in die woonstel in Almaty te vier. Hy het nuwe messegoed en breekgoed en plekmatjies en glase gekoop dat ons tweetjies my 60ste in styl kan vier.

Alleen. Soos die land se protokols beveel het.

As ek nie saam met my kinders op my verjaarsdag kan wees nie, verkies ek om die dag alleen saam met manlief te vier. Die kinders het gevideo bel, dus het dit gevoel of hulle wel naby was.

Maar ek wou mos eintlik vertel van die verjaarsdagete by De Vette Mossel.

As jy De Vette Mossel nog nie beleef het nie, moet jy regtig ‘n plan maak om daar uit te kom. Ek kan dit aanbeveel. Die kos is heerlik, maar die atmosfeer maak die dag! Dit is ontspanne, sonder gejaag. Heerlik.

Vanaand beproef ons ‘n restaurant in die stad waar ons nou reeds bykans drie weke bly. Neffens Pretoria. Saam met seun, skoondogter en kleinseun. My dollatjie gaan nie daar kan wees nie, sy het mos middel Julie Gauteng vir die Wes-Kaap verruil.

Twee weke later het ons twee die Noord-Kaap vir Gauteng verruil. Ek weet egter dat hulle, soos verlede jaar, in die gees wel saam met ons gaan wees. Al mis ek haar vreeslik baie gun ek haar die nuwe lewe op die platteland. Dit is waar mens jou kinders moet grootmaak.

Ek het myne ook in die platteland grootgemaak.

Hoe vier jy jou verjaarsdag?